مكان واحد جمع بين تجّار الشرق والغرب ، وسكن فيه سفراء وقناصل ، تاعوا نرجع شوي بالزمن ونشوف قصة خان العلبية.
– خان العلبية واحد من أكبر خانات حلب التجارية بيمتد على مساحة بتوصل ل 5600 متر مربع وفيه ساحة داخلية بتوصل لل 2000 متر
– بيرجع تاريخ هالخان للفترة العثمانية بناه والي حلب “محمد باشا دوقاكين” تحديداً في العام 1556م
– هلق سبب تسميتو بالعلبية مو مذكور بالمراجع التاريخية بس هو وقف لجامع العادلية، وفي روايات بتقول إنو كان ينباع فيه علب من خشب ومعدن، ومن هون طلع اسمو .
– إذا بدك تروح ع خان العلبية تاعى أدلك شلون بينراح عليه:
بتحط درج القلعة بضهرك وبتمشي على إيدك اليمين بتقطع خان الشونة وبضلك رايح باتجاه الجامع الأموي الكبير . بتلاقي خان العلبية وجنبو حمام النحاسين وسوق الجوخ . والمنطقة إلي موجود فيها اسمها ساحة بزة.
– أهمية خان العلبية ماكانت بس من أنو كان مركز تجاري بيجمع تجار بلاد الشام والصين والهند مع تجار أوروبا ، ولا بس من كونو بضم مكاتب ومستودعات وغرف مبيت لهالتجار ، أهميتو أجت كمان كونو مركز لكتير بعثات دبلوماسية وكان موجود فيه قنصليات نابولي وصقليّة وإسبانيا والبرتغال.
إذا مرّيت جنب خان العلبية أو زرتو أو بتعرف شي كمان عنو ، كتبلنا ياه بالتعليقات وخلينا نتذكر سوا …
المصادر:
عبد الله حجار (معالم حلب الأثرية) + مدونة وطن