هالخان يا جماعة من أقدم خانات حلب
مكانو بحارة المرعشلي.. برا أسوار المدينة القديمة، مقابيل باب النصر وبجنب سوق النحاسين… يعني بمنطقة كانت زمان قلب الحركة التجارية.
الخان يرجع لعهد المماليك، وتجديدو صار بآخر أيامن بزمن السلطان قانصوه الغوري، حوالي بداية القرن السادس عشر.
واسم “أوج خان” جاي من كلمة “أوج” بالتركي، يعني تلاتة؛ فالحكي المتوارث إنو يا إما كان في تلات خانات ملزوقين ببعض، يا إما هاد الخان هو الوحيد اللي ضلّ واقف من تلاتة اندثرو.
الواجهة تبعو مملوكية أصيلة، وحرفياً من أجمل بوابات الخانات بحلب… نقوش حجرية، أشكال هندسية ونباتية دقيقة بتاخد العقل .
المؤرخ عبد الله حجار بيحكيلنا إنو فوق باب الخان في كتابة مملوكية بتذكر أنو الأمير خاير بك هو اللي جددو، وهو آخر نوّاب السلطنة المملوكية بحلب قبل ما تدخل المدينة بعصر جديد. وبحسب الكتب القديمة مثل “نهر الذهب”، الخان كان محطة للتجّار: ينامو، يخزّنو بضاعتن، ويلاقو أمان بطرقات زمان.
وبوقتنا الحالي متل ما ذكرت الدكتورة نجوى عثمان، ما بقي منو غير المدخل، لأن الداخل انشوّه ببنايات طارئة. بس هالباب… لسا واقف متل شاهد حجر، وحامل روح المماليك بكل زخرفة ونقشة محفورة عليه.
المراجع:
معالم حلب الأثرية
نهر الذهب في تاريخ حلب