إذا كنت بالفرافرة وما اشتغل معك ال GPS خليك ضايع بهالحي وسماع صوت الحجار فيه وهي عمتحكي عن حلب.
• منقدر نقول إنو موقع حي الفرافرة بيجي من تحت القلعة لباب النصر، وجنبه جامع الكلتاوية، وخان الشونة، وباب الأحمر، وجادة الخندق.
• حي الفرافرة واحد من أقدم وأعرق أحياء مدينة حلب. في مراجع بتقول إنو عمر هالحي من عمر الدولة الأموية بحلب، يعني شي من 1300 سنة، وكان وقتها اسمو “المعقلية”.
أما كتب تانية متل “أحياء حلب وأسواقها” لخير الدين الأسدي، و”نهر الذهب في تاريخ حلب” لكامل الغزّي، فبتقول إنو التاريخ الموثق لحي الفرافرة بيرجع للقرن الثالث عشر الميلادي، يعني قبل شي 800 سنة.
• أما بخصوص اسم “الفرافرة”، فهالقصة عليها روايات كتيرة:
◦ في ناس بيقولوا إنو الاسم مأخوذ من واحة الفرافرة بصحراء ليبيا.
◦ وفي ناس بيقولوا إنو الاسم محرّف من نهر الفرات – يعني “فرا”.
◦ وفي مؤرخين قالوا إنو الاسم جاي من كلمة “فرّار”، لأنو الشباب المطلوبين للإنكشارية كانوا يهربوا ويتخبّوا بهالحي.
• بيمتاز حي الفرافرة بالبيوت الحلبية التقليدية: الغرف حوالين ساحة داخلية، بنصها بحرة أو نافورة مي، مع نمط معماري حلبي أصيل من أقواس وقباب.
• أهمية هالحي بتبيّن من كثرة الأبنية العامة فيه: الزوايا، التكايا، المدارس، وسبلان المي. وهاد الشي خلّى كتير من الولاة والسلاطين يسكنوا فيه.
• من أبرز معالم الحي:
حمّام السلطان،
زاوية النسيمي،
جامع الناصرية،
المدرسة الشعبانية، والإسماعيلية، والسيافية، وخانقاه الفرافرة، واللي يُعتبر من أهم معالم حلب الأثرية، انبنت بأمر من الملكة ضيْفة خاتون، زوجة ملك حلب الظاهر غازي سنة 1237 م. وهاد الخانقاه كان مأوى للمتصوفين، والفقراء، وطلاب العلم.
ولأنو الحارات متل الناس بيذكرها الي بحبها ، خبرنا عن شي ذكرى الك بحي الفرافرة